Tarix elə hadisələrlə zəngindir ki, onlar yalnız bir xalqın taleyini deyil, bütöv bir millətin gələcəyini dəyişir. Azərbaycan xalqının yaddaşına qızıl hərflərlə yazılmış 8 Noyabr – Zəfər Günü də məhz belə möhtəşəm tarixi hadisələrdən biridir. Bu gün sadəcə hərbi qələbənin ildönümü deyil, milli iradənin, sarsılmaz birliyin, dövlətçilik əzminin və illərlə qorunub saxlanılan Vətən sevgisinin təntənəsidir. Zəfər Günü Azərbaycan xalqının öz torpaqlarına qovuşmasının, tarixi ədalətin bərpasının və dövlətimizin gücünün bütün dünyaya nümayiş etdirilməsinin rəmzidir. Otuz ilə yaxın davam edən işğal dövrü Azərbaycan xalqının yaddaşında dərin izlər buraxmışdı. Doğma yurdlarından didərgin düşmüş yüz minlərlə insanın Vətən həsrəti, dağıdılmış şəhər və kəndlərimiz, tarixi və mədəni abidələrimizin məhv edilməsi xalqımızın qəlbində sağalmaz bir ağrıya çevrilmişdi. Lakin Azərbaycan xalqı heç zaman öz torpaqlarından imtina etmədi. Zaman keçdikcə güclənən dövlətimiz, möhkəmlənən ordumuz və dəyişməz siyasi iradəmiz tarixi ədalətin bərpasına aparan yolun əsasını qoydu. Bu tarixi mübarizədə Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi və qətiyyətli siyasi iradəsi xüsusi əhəmiyyət daşıyırdı. Prezident İlham Əliyev uzun illər ərzində Azərbaycanın milli maraqlarını beynəlxalq müstəvidə müdafiə etdi, ölkəmizin iqtisadi və hərbi potensialının gücləndirilməsi istiqamətində ardıcıl siyasət həyata keçirdi. Onun uzaqgörən strategiyası, diplomatik fəaliyyəti və prinsipial mövqeyi Azərbaycanın gələcək Zəfərinin mühüm siyasi və hərbi əsaslarını formalaşdırdı. 2020-ci il sentyabrın 27-də başlayan Vətən müharibəsi xalqımızın taleyində yeni bir səhifə açdı. Ali Baş Komandan İlham Əliyevin rəhbərliyi altında Azərbaycan Ordusu torpaqlarımızın azadlığı uğrunda əks-hücuma keçdi. Bu müharibə Azərbaycan xalqının yalnız hərbi gücünü deyil, həm də milli həmrəyliyini, mənəvi bütövlüyünü və sarsılmaz iradəsini nümayiş etdirdi. Məhz həmin günlərdə xalqımızın yaddaşına əbədi həkk olunan “Dəmir yumruq” ifadəsi milli birliyin, dövlət qətiyyətinin və sarsılmaz iradənin rəmzinə çevrildi. Dəmir yumruq təkcə hərbi gücü ifadə etmirdi. O, Azərbaycan xalqının bir amal ətrafında birləşməsini, dövlətinə və ordusuna inamını, milli maraqların müdafiəsində vahid mövqedən çıxış etməsini simvolizə edirdi. İlham Əliyevin komandanlığı altında həyata keçirilən Dəmir Yumruq əməliyyatı Azərbaycanın müasir tarixində misilsiz hərbi-siyasi hadisə kimi yadda qaldı. Ordumuzun peşəkarlığı, əsgər və zabitlərimizin qəhrəmanlığı, xalqımızın mənəvi dəstəyi və Ali Baş Komandanın qətiyyətli rəhbərliyi nəticəsində işğal altındakı ərazilərimizin böyük hissəsi azad edildi. Cəmi 44 gün davam edən müharibə Azərbaycanın hərbi qüdrətini, müasir döyüş imkanlarını və milli iradəsini bütün dünyaya nümayiş etdirdi. Şuşanın azad edilməsi isə Zəfər tariximizin ən möhtəşəm səhifələrindən biri oldu. Qarabağın tacı, Azərbaycan mədəniyyətinin beşiyi olan Şuşanın azadlığı həm hərbi, həm də mənəvi baxımdan böyük əhəmiyyət daşıyırdı. Şuşa yalnız bir şəhər deyildi; o, milli kimliyimizin, musiqimizin, ədəbiyyatımızın, tarixi yaddaşımızın ayrılmaz parçası idi. Şuşanın azad olunması ilə Azərbaycan xalqı öz mədəni və mənəvi dəyərlərinə qovuşdu. 2020-ci il noyabrın 8-də Prezident İlham Əliyevin Şuşanın azad edilməsi xəbərini xalqımıza çatdırması Zəfər sevincini zirvəyə yüksəltdi. Noyabrın 10-da imzalanmış üçtərəfli Bəyanatla hərbi əməliyyatlar dayandırıldı və Azərbaycanın ərazi bütövlüyünün bərpası istiqamətində mühüm mərhələ başa çatdı. Bu Zəfərin arxasında minlərlə qəhrəmanımızın fədakarlığı, şəhidlərimizin müqəddəs qanı, qazilərimizin iradəsi və bütöv bir xalqın birliyi dayanır. Şəhidlər Vətən torpağını öz canlarından üstün tutaraq tarix yazdılar. Onların qəhrəmanlığı heç zaman unudulmayacaq. Qazilərimizin göstərdiyi şücaət isə gələcək nəsillər üçün əsl vətənpərvərlik nümunəsidir. Zəfərin sevincini yaşayarkən bu qələbənin hansı ağır itkilər və fədakarlıqlar hesabına qazanıldığını unutmamaq hər birimizin mənəvi borcudur. Zəfərdən sonra qarşıda yeni və məsuliyyətli bir mərhələ başladı: azad edilmiş ərazilərin bərpası, yenidən qurulması və Böyük Qayıdışın təmin edilməsi. Uzun illər doğma yurdlarından ayrı düşmüş insanların öz evlərinə qayıtması, Qarabağda həyatın yenidən canlanması Zəfərin davam edən tarixi nəticələridir. Bu gün Qarabağda aparılan quruculuq işləri, yeni yolların, yaşayış məntəqələrinin, məktəblərin və digər infrastruktur obyektlərinin inşası dövlətimizin gələcəyə yönəlmiş strategiyasının göstəricisidir. Zəfər Günü həm də gələcək nəsillərə ötürülməli olan böyük bir mənəvi dərsdir. Bu dərs bizə öyrədir ki, milli birlik, dövlətə sədaqət, tarixi yaddaş və Vətən sevgisi hər bir xalqın ən böyük gücüdür. Bir xalq öz milli dəyərlərinə sahib çıxırsa, dövlətinin ətrafında birləşirsə və gələcəyinə inamla addımlayırsa, qarşıya qoyduğu məqsədlərə nail ola bilər. Bu gün 8 Noyabrı qeyd edərkən yalnız qələbəmizə sevinmir, həm də müstəqil və güclü Azərbaycanın gələcəyinə olan inamımızı ifadə edirik. Zəfər Günü xalqımızın tarix qarşısında öz sözünü dediyi, milli ləyaqətini və dövlətçilik əzmini təsdiqlədiyi gündür. “Dəmir yumruq” Azərbaycan xalqının birliyinin, İlham Əliyevin qətiyyətli rəhbərliyinin, ordumuzun gücünün və milli iradəmizin tarixi simvolu olaraq yaddaşlarda yaşayacaq. Zəfərimiz əbədi, dövlətimiz qüdrətli, bayrağımız daim ucalarda olsun! Şəhidlərimizin əziz xatirəsi qarşısında baş əyir, qazilərimizə ehtiramımızı bildirir və bu tarixi Zəfərin memarlarından olan Azərbaycan xalqını 8 Noyabr – Zəfər Günü münasibətilə təbrik edirik. Yaşasın müstəqil Azərbaycan! Yaşasın Azərbaycan Ordusu! Qarabağ Azərbaycandır!

Pedaqoq: Əsmər Məmmədova