“Türk dillərinin ekologiya terminləri lüğəti”nin təqdimatı keçirilib
Ekologiya və Təbii Sərvətlər Nazirliyində Beynəlxalq Türk Akademiyası tərəfindən nəşr olunan “Türk dillərinin ekologiya terminləri lüğəti”nin təqdimatı keçirilib.
Təqdimatda ekologiya və təbii sərvətlər nazirinin müavini Vüqar Kərimov, layihənin elmi rəhbəri Beynəlxalq Türk Akademiyasının prezidenti akademik Şahin Mustafayev, layihənin elmi əlaqələndiricisi, Beynəlxalq Türk Akademiyasının eksperti, doktor Aynur Mayemerova, AMEA-nın vitse-prezidenti akademik İradə Hüseynova, AMEA-nın müxbir üzvü Zeynal Əkbərov, professor Elman Yusifov, eyni zamanda digər alim və professorlar iştirak edib.
Qeyd edək ki, lüğət azərbaycanlı professor Elman Yusifovun və digər türkdilli dövlətlərin alimlərinin müəyyənləşdirərək təqdim etdiyi terminlər toplusu əsasında beynəlxalq mütəxəssislər qrupu tərəfindən hazırlanıb.
1 cilddən ibarət 5000-ə yaxın ekoloji termini əhatə edən lüğətdə terminlər 11 dildə - ingilis, rus və 9 türk - Azərbaycan, başqırd, qazax, qaraqalpaq, qırğız, özbək, tatar, türk və türkmən dilində təqdim olunur.
