“12 addım” Reabilitasiya Mərkəzinə kitablar hədiyyə edildi
Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin (MKS) M.Ş.Vazeh adına Mərkəzi Kitabxanası və X.B.Natəvan adına 4 №-li kitabxana filialı narkomaniya, alkoqolizm və oyun asılılığından psixoloji müalicə “12 addım” Reabilitasiya Mərkəzinə kitablar hədiyyə etdilər.
Yasamal rayon MKS-nin direktoru tarix üzrə fəlsəfə doktoru, Fəxri mədəniyyət işçisi Lətifə Məmmədova görüşdə bildirdi ki, müasir dövrümüzda əsrin bəlasına çevrilən “ağ ölüm”lə mübarizə aparmaq, sağlam gəncliyimizi və sağlam gələcəyimizi qorumaq hər bir şəxsin borcudur. Narkotik asılılığı, alkoqolizmdən əziyyət çəkənlərin sayı artır. Gəncləri bu bəladan qorumaq üçün məktəblərin, kitabxanaların üzərinə böyük məsuliyyət düşür. Maarifləndirici tədbirlərin keçirilməsinin əhəmiyyəti böyükdür. O, asudə vaxtın səmərəli təşkilində kitab oxumağın əhəmiyyətindən danışdı, kitab oxumağın müalicə üsulu, biblioterapiya olduğunu vurğuladı. 4 №-li kitabxana filialının müdiri Kamilə Novruzova, Mərkəzi Kitabxananın əməkdaşları Sevil Namazova və İradə Hüseynova mərkəzə kitablar hədiyyə etdilər.
“12 addım” Reabilitasiya Mərkəzinin rəhbəri, asılılıq uzrə mütəxəssis Əkbər Cəfərov bildirdi ki, ölkəmizdə bu istiqamətdə müxtəlif tədbirlər və “12 addım” proqramı həyata keçirilir. Sağlam və xoşbəxt həyata qayıtmaq üçün burada onlarla insanlar müalicə alır.
Psixoterapevt, parapsixoloq Əhməd Əhmədov narkotik asılılığının evdə müalicəsinin çətinliyindən danışdı və qeyd etdi ki, asılılıq zamanı həm mənəvi, həm də fiziki problemlər yaranır. Bunun üçün psixoloq və həkimlərin müalicəsi birgə aparılmalıdır.
Babək Muxtarov ali təhsilli əzcaçı olmağına baxmayaraq, əvvəllər narkotik asılılığından əziyyət çəkdiyini qeyd etdi. Yaşadığı problemlərdən çıxa bildi və başqalarına örnək oldu. O, asılılıq üzrə mütəxəssis kimi mərkəzdə müalicə alanlara sağlam və xoşbəxt həyata dönmələri üçün kömək edir.
Bu gün gənclərimizi, gələcəyimizi qorumaq üçün maarifləndirici tədbir və görüşlər keçirilməsi vacib məsələlərdəndir. Mərkəzin kollektivi bu maraqlı görüşə və mənəvi dəstəyə görə Yasamal rayon MKS-inə təşəkkürünü bildirdi. Onlar hədiyyə olunan kitablara böyük maraq göstərdilər.
“12 addım” Reabilitasiya Mərkəzinin rəhbəri Əkbər Cəfərov sağlam gələcəyimiz və sağlam gəncliyimiz üçün gördüyü işlərə görə Yasamal rayon MKS-inin Fəxri fərmanı və mərkəzin kolektivi gördüyü işlərə görə Təşəkkürnamə ilə təltif edildilər.
Görüşdə yazıçı və şairlər, qazi və veteranlar, KİV nümayəndələri, ziyalılar iştirak etdilər.
